Ташкили қатли шавҳар аз ҷониби зан

Душанбе, 18.01.2016. (АМИТ «Ховар»). — 17-уми январ дар натиҷаи гузаронидани чорабиниҳои фаврӣ-ҷустуҷӯӣ аз ҷониби кормандони милитсия зани 28-солаи ноҳияи Ашт ва ҳамдеҳаи ӯ марди 47-солаи қаблан бо моддаҳои 108 (таҳрири соли 1961) ва 244 қисми 3 Кодекси ҷиноятии Ҷумҳурии Тоҷикистон судшуда, ҳамчун гумонбар дар содир намудани ҷинояти куштор дастгир гардиданд.
Тафтишот муайян намуд, ки зани гумонбаршуда бо маслиҳати пешакӣ бо ин мард шавҳараш, марди 32-солаи ҳамин ноҳияро 06- уми январ дар ҳавлии истиқоматиаш бо роҳи фиреб барои таъмир намудани насоси обкашӣ ба дохили чоҳи чуқуриаш 4 метр дароварда, бо санг якчанд маротиба задаанд. Дар натиҷа марди ҷабрдида ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидааст. Сипас гумонбаршудагон ҷасади мардро ба мошини тамғаи “Мерседес-Бенс-190” бор карда, ба ҳудуди заминҳои саҳроӣ бурда, ба болои ҷасад сӯзишвории дизелиро пошида, оташ задаанд.
Дар вақти ташхиси криминалистӣ қисми боқимондаи ҷасади марҳум дарёфт шуд.
Аз рӯи ин ҳодиса парвандаи ҷиноятӣ оғоз гардида, тафтиш идома дорад.