Таваҷҷуҳи Пешвои миллат Э. Раҳмон ба амали ғайриинсонии ҷангии «Давлати исломӣ»

Душанбе, 20.01.2016. (АМИТ «Ховар»). -Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон зимни ироаи Паёми навбатии хеш ба Маҷлиси Олии кишвар нисбат ба амали ғайриинсонии ҷангии суриягии гурӯҳи террористии ба ном «Давлати исломӣ», ки дар назди омма модарашро ба қатл расонд, таваҷҷуҳи хос зоҳир намуд.
Сарвари давлат аз ҷумла гуфт: «Ҳамаи мову шумо аз ҳодисае, ки ҳафтаи гузашта дар Сурия рух дод, огоҳ ҳастем. Ин ҳодиса бисёр ваҳшатангез аст. Вақте террорист модари худро ваҳшиёна қатл мекунад, модареро, ки фарзандашро аз чанд кишвар, бо чӣ гуна азобу ранҷ кофтукоб карда, меёбад- ин ислом аст? ин дин аст? Ин ваҳшоният аст! Ҳол он ки Сурия, Ироқ, Яман, Афғонистон ҳама кишварҳои исломӣ ҳастанд. Инро ман ба мардуми шарифи Тоҷикистон таъкид карда мегӯям, зеро ки мову шумо дар солҳои 90-уми асри гузашта ҳамаи ин бадбахтиҳоро аз сар гузарондем».
Президенти кишвар, Пешвои миллат Эмомалӣ Раҳмон таъкид намуд, ки рӯйдодҳои охири ҷаҳон, яъне боз ҳам тезутунд гардидани вазъият дар Шарқи Наздик, Осиё, Африқои Шимолӣ, Аврупо ва дигар минтақаҳои дунё нишон медиҳад, ки терроризм ва экстремизм ба хатарҳои аввалиндараҷаи ҷаҳони муосир табдил ёфтаанд.
Бори дигар аз мардуми Тоҷикистон, хоса ҷавонон даъват карда шуд, ки дар муқобили ин хатарҳо муттаҳид бошанд, ҳушёрию зиракии сиёсиро аз даст надиҳанд ва ба фиребу гумроҳсозиҳои ифротгароёни тундрав дода нашаванд.