Тавилдара: 5 ҳолати риоя накардани талаботи меъёрҳои шаҳрсозӣ ба қайд гирифта шуд

Тавилдара, 16.01.2016. (АМИТ «Ховар»).- Дар соли 2015 барои сохтмони асосии ноҳияи Тавилдара аз буҷет 1 миллион сомонӣ пешбинӣ гардида буд, ки аз ин 583 ҳазор сомонӣ барои идома додани сохтмони бинои мақомоти иҷроияи ноҳия, 200 ҳазор сомонӣ барои сохтмони синфхонаҳои иловагӣ дар назди муассисаи таҳсилоти ибтидоии № 56-и деҳаи Вуҷун ва 133 ҳазор сомонӣ барои сохтмони синфхонаҳои иловагӣ дар назди муассисаи таҳсилоти миёнаи умумии №15-и деҳаи Шур ҷудо гардидааст, ки корҳои сохтмонӣ дар биноҳои мазкур ба итмом расонида шуданд.
Аз ҳисоби мақомоти иҷроияи ҳокимияти давлатии ноҳия ва ташкилоти ғайридавлатӣ дар якчанд иншооти ноҳия корҳои сохтмонӣ идома дошта, баъзеашон ба истифода дода шуданд.
Ҷамъ аз ҳамаи сарчашмаҳои маблағгузорӣ дар соли сипаригардида ба маблағи 13 миллиону 220 ҳазор сомонӣ корҳои сохтмонӣ ба анҷом расонида шуда, сохтмони баъзе аз онҳо дар соли 2016 идома меёбанд.
Инчунин дар соли 2015 аз тарафи бахши меъморию шаҳрсозӣ 5 ҳолати риоя накардани талаботи меъёрҳои шаҳрсозӣ ба қайд гирифта шуда, аз ин ҳисоб ба маблағи 4 ҳазору 280 сомонӣ ҷарима ситонида шуд.