Техникаву яроқҳои Қазоқистон иқтидори артиши Урдунро меафзоянд

Душанбе, 26.01.2016. (АМИТ «Ховар») -Таҷҳизот ва силоҳҳои ҳарбии истеҳсоли Қазоқистон иқтидори низомии артиши Урдунро пурра мегардонанд. Тавре ки Маркази матбуоти Вазорати мудофиаи Қазоқистон хабар медиҳад, барои дастрас намудани таҷҳизоти низомӣ, дар ҷараёни сафари вазири мудофиаи Қазоқистон ба Урдун созишнома ба имзо расид. Тибқи иттилои манбаъ, яке аз мавзуъҳои муҳими ин сафар низ ба имзо расонидани созишнома байни ҳукумати Қазоқистон ва Шоҳигарии Ҳошимии Урдун дар бораи ҳамкории ҳарбӣ ва ҳарбӣ-техникӣ арзёбӣ мегардад. Ин созишнома ҳамчунин барои ҳамкорӣ байни қувваҳои мусаллаҳ ва саноати мудофиаи ду кишвар низ заминаи мусоид хоҳад гузошт. Дар доираи ин созишнома барои харид намудани мошинҳои зиреҳпӯши чархдори «Арлан»-и Қазоқистон низ мувофиқа ҳосил шудааст.
Мошинҳои низомии зиреҳпӯшро ширкати маҳаллии «Қазоқистон Парамаунт инҷиниринг», ки охири соли гузашта дар Остона кушода шуд, истеҳсол менамояд. Ин навъи мошини зиреҳпӯш барои ҳамаи фаслҳои сол ва шароити иқлим муносиб буда, аз лиҳози тавоноии техникӣ ба талаботи низомӣ ҷавобгӯст. Тибқи хулосаи техникӣ ин мошинҳо 50 кг маводи таркандаро тобовар мебошанд ва ҳатто дар сурати инфиҷори аз 8 то 14 кг тротил зарар намебинанд.