Ваҳдат: Амалисозии барномаи рушди шаҳр

Ваҳдат,15.01.2016 (АМИТ «Ховар» )- Дар соли 2015 «Барномаи рушди шаҳри Ваҳдат барои солҳои 2016 — 2020» аз ҷониби Ҳукумати Ҷумҳурии Тоҷикистон қабул гардид. Дар барномаи мазкур 193 лоиҳа ворид шудааст, ки маблағи умумии он 1 миллиарду 73 млн. сомониро ташкил медиҳад.
Барномаи мазкур барои муҳайё намудани фазои мусоиди соҳибкорӣ, ба кор даровардани иқтидорҳои нави истеҳсолӣ, ҳамгироӣ ба иқтисодиёти ҷаҳонӣ ва беҳтар намудани шароити иҷтимоии аҳолӣ заминаи воқеӣ мегузорад.
Дар ин замина, барномаи мазкур ҳамчун ҳуҷҷати асосии шаҳр афзалият ва самтҳои умумии сиёсати шаҳрро муайян менамояд, ки ба ноил шудан ба рушди устувори иқтисодии шаҳр, дастрасии осони аҳолӣ ба хизматрасониҳои заминавии иҷтимоӣ ва паст кардани сатҳи камбизоатӣ нигаронида шудааст.
Дар баробари амалӣ гаштани барномаи мазкур шароит муҳайё мегардад, ки ҷараёни татбиқ гардидани дигар барномаҳои соҳавӣ низ рӯ ба афзоиш оранд.