Вазири адлия: Сохтмони ду муассисаи нави ислоҳӣ дар назар аст

Душанбе, 28.01.2016 (АМИТ «Ховар») — Муассисаҳои ислоҳӣ, ки дар тобеияти Вазорати адлияи мамлакат қарор доранд, тартиби нигоҳубини маҳбусонро дар доираи қонунҳои амалкунанда ҷорӣ карда, кӯшиш мекунанд, ки меъёрҳои минималии нигоҳдории маҳбусон дар муассисаҳои ислоҳӣ пурра риоя шаванд, — изҳор кард Рустам Шоҳмурод, вазири адлияи мамлакат имрӯз зимни нишасти матбуотӣ.
«Албатта, камбудиҳо ва мушкилиҳо низ ҳастанд, мо инро рӯпӯш карданӣ нестем, — гуфт Рустам Шоҳмурод, — аз ҷумла, дучор шудани маҳбусон ба бемориҳо моро бетараф гузошта наметавонад. Бинобар ҳамин, дар ин масъала бо Вазорати тандурустӣ ва дигар ташкилоти дахлдор ҳамкорӣ дорем. Барои бо тамоми шароит таъмин намудани муассисаҳои табобатии ислоҳӣ тадбирҳо андешида мешаванд.
Вобаста ба сохтмони биноҳои муассисаҳои ислоҳӣ Рустам Шоҳмурод гуфт, ки бунёди муассисаи ислоҳӣ дар шаҳри Ваҳдат дар арафаи анҷомёбист. Дар маҷмӯъ ба сохтмони ин муассиса беш аз 39 миллион сомонӣ аллакай сарф шуда, имсол маблағгузорӣ дар ҳаҷми 9 миллион сомонӣ дар назар дошта шудааст. Ҳамчунин сохтмони ду муассисаи дигар дар назар дошта шуда, ҳоло масъалаи интихоби мавзеъ ва корҳои лоиҳавии онҳо идома дорад.