А. Қодирӣ: Боғпарварон 6 сол аз супоридани андоз озоданд

Хуҷанд, 08.02.2016 (АМИТ «Ховар»).- 5-уми феврал бо иштироки раиси вилояти Суғд Абдураҳмон Қодирӣ дар дашти Сомғори ноҳияи Бобоҷон Ғафуров ба 110 нафаре, ки барои гирифтани замин ҷиҳати бунёди бобати интенсивӣ ба Мақомоти иҷроияи ҳокимияти давлатии вилояти Суғд муроҷиат намуда буданд, 765 гектар замин тақсим шуд.
Ҳамчунин гуфта шуд, ки дар шафати шаҳраки Сайҳун дар ояндаи наздик 1000 гектар боғоти сиёҳолу, зардолу, шафтолу ва бодом бунёд хоҳад шуд.
Зимни суҳбат раиси вилоят Абдураҳмон Қодирӣ ба соҳибкорону боғпарвароне, ки соҳиби замин шуданд, изҳор дошт, ки яке аз ҳадафҳои асосии азхудкунии заминҳои ташналаби дашти Сомғор- ин таъсиси ҷойҳои корӣ буда, ҳиссагузорӣ дар таъмини амнияти озуқаворӣ ва боло бурдани неруи содиротии вилоят ва мамлакат аз ҳадафҳои дигари ин иқдом мебошад. Раиси вилоят дар идомаи суҳбат ба боғпарварон тавсия дод, ки барои бунёди боғ ниҳолҳоро аз муассисаҳои ниҳолпарварӣ якҷо бо ҳуҷҷати кафолат бигиранд. Вай ҳамзамон таъкид намуд, ки ин минтақа барои бунёди боғ хеле мусоид буда, обёрии он бар зиммаи Мақомоти иҷроияи ҳокимияти давлатии вилояти Суғд аст ва дар ин росто мушкиле пеш нахоҳад омад. Бо назардошти он ки заминҳои ин мавзеъ нав аз худ шудаанд, соҳибкорону боғпарварон 6 сол аз супоридани ҳама гуна андоз озод мебошанд.
Абдураҳмон Қодирӣ ҳамзамон таъкид намуд, ки бо ҳидоятҳои Пешвои миллат Эмомалӣ Раҳмон дар шаҳраки Сайҳун наздик ба 5 ҳазор нафар қитъаи замини наздиҳавлигӣ дода шудааст ва сокинон бояд ҳарчи зудтар хонаҳои истиқоматии худро бунёд намоянд.