Агентии беҳдошти замин ва обёрӣ аз “Барқи Тоҷик” қарздор аст

Душанбе, 4.02.2016 (АМИТ «Ховар»).-«Як мушкилии асосии соҳа ҷамъоварии маблағ мебошад, ки ШСХК «Барқи Тоҷик»-ро ба ташвиш овардааст ва ин дар сатҳи ниҳоят паст пардохт шудани маблағ аз тарафи корхонаҳои Агентии беҳдошти замин ва обёрӣ мебошад»,-гуфт имрӯз зимни нишасти матбуотии ин ниҳод раиси ШСХК «Барқи Тоҷик» Исмоилзода Мирзо Иброҳим.
Новобаста ба дастгириҳои соҳаи хоҷагии оби ҷумҳурӣ аз тарафи Ҳукумати Ҷумҳурии Тоҷикистон, ки маблағи қарзи агентии мазкур 242,9 млн. сомонӣ ҳисоббаробаркунӣ шуда, аз соли 2010 то ин ҷониб нисбат ба онҳо тарофаи имтиёзнок татбиқ шуда истодааст, дар соли 2015 корхонаҳои Агентии беҳдошти замин ва обёрӣ ба маблағи 29,5 млн.сомонӣ энергияи барқро истифода намуда, пардохти онро ҳамагӣ ба маблағи 2,3 млн. сомонӣ (7,8%) таъмин намуданд, ки ин ба вазъи молиявии ширкат таъсири манфӣ мерасонад.
Бо мақсади кам намудани қарзҳои дебиторӣ ва рўёнидани маблағи энергияи барқ аз истифодабарандагон, ширкати «Барқи Тоҷик» дар соли 2015 ба муштариён 2079 даъво ба маблағи 112,3 млн. сомонӣ пешниҳод намуд, ки аз маблағи умумии даъвои пешниҳодшуда 35,5 млн. сомониаш пардохт шудааст. “Инчунин дар асоси муроҷиатҳои Ширкати “Барқи Тоҷик” аз тарафи мақомоти суди иқтисодӣ дар ин давра 59 аризаи даъвогӣ баррасӣ гардида, ҳалномаҳо ба маблағи 33,0 млн. сомонӣ ба манфиати ширкати «Барқи Тоҷик» ҳал гардиданд”,-илова намуд раиси “Барқи Тоҷик”.