Ҷаримабандӣ шудани 103 корманду соҳибкори инфиродӣ дар Хуҷанд

Хуҷанд, 04.02.2016 (АМИТ «Ховар»).- Кормандони Раёсати Хадамоти назорати давлатии фаъолияти фарматсевтӣ дар вилояти Суғд дар 701 муассисаи фарматсевтӣ, 114 муассисаи табобатию профилактикӣ, новобаста аз шакли моликияташон ва 334 мағоза, нуқтаву дўконҳои фурўши маводи ороишию беҳдоштӣ назорат ва санҷишҳо гузарониданд.
Дар натиҷа 451 номгўй ба миқдори 28 954 адад маводи доруворӣ, молҳои тиббӣ ва маводи ороишию беҳдоштии муҳлати истифодаашон гузашта, 903 номгўй ба миқдори 22 732 адад маводи доруворӣ ва молҳои тиббии бесертификати мутобиқати сифат, 20 номгўй маводи доруворӣ ва 43 номгўй ба миқдори 1150 адад маводи ороишию беҳдоштии ба талаботи меъёрҳои муқарраршуда ҷавобгўй набуда дарёфт шуд.
Дар асоси камбудиҳои ошкоргардида нисбат ба 103 соҳибкори инфиродӣ, кормандони муассисаҳои фарматсевтӣ ва кормандони муассисаҳои табобатию пешгирикунанда парвандаи ҳуқуқвайронкунии маъмурӣ оғоз шуда, онҳо ба маблағи умумии 207 ҳазору 400 сомонӣ ҷаримабандӣ шуданд.