Боздиди гурӯҳи кории ҳукуматӣ аз водии Бартанг

Хоруғ, 29.02.2016. (АМИТ «Ховар»).-Ҳайати гурӯҳи кории Ҳукумати Ҷумҳурии Тоҷикистон аз кӯли Сарез дидан намуда, бо мардуми аз офати табиӣ зарардидаи деҳаи Ғудараи водии Бартанг мулоқот дошт. Ба ҳайати гурӯҳи корӣ раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Назарзода Рустам Ормон ва мутахассисони ин кумита, ҳамчунин роҳбари Барномаи башардӯстонаи ФОКУС дар Тоҷикистон ва мутахассиси соҳаи сейсмологӣ ва зилзиласанчӣ, инчунин роҳбарияти ВМКБ шомил буданд. Сардори Раёсати ҳолатҳои фавқулода оид ба бехатарии кӯли Сарез Қадамшо Маскав иттилоъ дод, ки ҳоло дар мавзеи кӯли Сарез ҳаво рӯзона 4- 5 дараҷа хунук мебошад. Шабона ҳаво 13- 15 дараҷа хунук мешавад. Тамоми кӯли Сарезро 35 см ях фаро гирифтааст. Обшавии пиряхҳое, ки дар қаторкӯҳҳои атрофи кӯл мавҷуд ҳастанд ва кӯли Сарез аз онҳо об мехӯрад, ба чашм намерасад. Кӯли Сарез дар ҳолати пештара қарор дорад. Низоми азназаргузаронии компютерӣ дар ин мавзеъ фаъолияти хуб дорад.
Ҳамчунин гурӯҳи кории ҳукуматӣ бо сокинони деҳаи Ғудара мулоқот орост. Бояд гуфт, ки барои оилаҳои аз офати табиӣ заррардидаи водӣ масолеҳи сохтмонӣ пурра дастрас гардида, бо гармтар гардидани ҳавои кӯҳистон бунёди хонаҳои истиқоматӣ дар ин деҳа ва дигар деҳаҳои водии Бартанг оғоз меёбад.