Дар ду рӯз беш аз 1600 гуреза аз Сурия ба Туркия ворид шуд

Анқара, 02.02.2016. (АМИТ «Ховар»). — Дар ин бора рӯзи якшанбе Раёсати ҳолатҳои фавқулодда ва офатҳои табиии Туркия иттилоъ дод.
Бино ба иттилои манбаъ, дар давоми ду рӯз 1635 гуреза аз Сурия ба ҳудуди Туркия гузаштааст.
«Туркманҳо ва арабҳои Сурия аз сабаби ҳамлаҳои зиёд дар минтақаи Байирбуҷак хонаҳои истиқоматиашонро тарк карда истодаанд. Дар рӯзҳои охир, ҳазорон оила дар лагерҳои Ямадӣ дар қаламрави Сурия ҷойгир карда шуданд. Дар робита ба он, ки хатар барои онҳо дар ин ҷо низ зиёд гардид, рӯзҳои 29-30 январ 1635 нафар, ки аксарияташонро занон, кӯдакон ва пиронсолон ташкил медиҳад, ба қаламрави Туркия гузаштанд. Онҳо дар манзили хешовандонашон ва дар марказҳои қабули гурезагони музофотҳои Хатай, Газиантеп ва Шанлиурф ҷойгир карда шуданд», — гуфта мешавад дар изҳороти Раёсати ҳолатҳои фавқулодда ва офатҳои табиии Туркия.