Дар ҷумҳурӣ беш аз 3 ҳазор муассисаи рўзонаи таҳсилоти умумӣ фаъоланд

Душанбе, 01.02.2016. (АМИТ «Ховар»).- Аз рўи маълумоти Вазорати маориф ва илми Ҷумҳурии Тоҷикистон дар оғози соли таҳсили 2015-2016 дар ҷумҳурӣ 3 ҳазору 846 муассисаи рўзонаи таҳсилоти умумӣ фаъолият мекунанд, ки нисбат ба соли гузашта 10 адад зиёд аст.
Шумораи хонандагон дар муассисаҳои рўзонаи таҳсилоти умумӣ 1784,4 ҳазор нафарро ташкил намуда, нисбат ба соли таҳсили 2014-2015-ум 42,8 ҳазор нафар зиёд шудааст. Шумораи духтарон 851,2 ҳазор нафар ё 47,7 фоизи шумораи умумии хонандагонро ташкил медиҳад.
Аз шумораи умумии муассисаҳои рўзонаи таҳсилоти умумӣ дар соли таҳсили 2015-2016 дар ҷумхурӣ 68 литсей фаъолият намуда, 28,9 ҳазор нафар хонандагонро дар бар мегирад, аз онҳо 8,3 ҳазор нафар духтарон мебошанд. Миқдори гимназияҳо ба 83 адад расидааст, шумораи хонандагонашон 49,9 ҳазор нафар буда, аз онҳо 17,8 ҳазор нафар духтарон мебошанд.