Даъвати хонандагон ба ҳушёрию муттаҳидӣ

Душанбе, 25.02.2016 (АМИТ «Ховар»). -24-уми феврал бо ташаббуси роҳбарияти Вазорати корҳои дохилӣ дар мактаби таҳсилоти миёнаи умумии №8-и ноҳияи Исмоили Сомонии шаҳри Душанбе вохӯрии судманд доир шуд, ки дар он сардори Хадамоти пешгирии ҳуқуқвайронкунии ШВКД дар ноҳияи Исмоили Сомонӣ майори милитсия Баҳрулло Саидов, ҷавонони фаъоли гурӯҳи «Пешоҳанг» Аслиддин Хушвахтов ва Мардихудо Давлатов иштирок доштанд.
Аслиддин Хушвахтов оид ба вазъи имрӯзаи ҷумҳурӣ ва ҷаҳон сухан ронда, доир ба ҳодисаҳои нангине, ки дар як зумра кишварҳои мусулмонӣ рух дода истодаанд, изҳори андеша кард.
Мардихудо Давлатов, аъзои дигари гурӯҳи «Пешоҳанг» доир ба оқибатҳои ҷалби ҷавонони ноогоҳ ба низоъҳои мамлакатҳои Сурияву Ироқ, ки ба ҷуз бадбахтӣ чизе намеоранд, зикр кард, ки имрӯз наврасону ҷавонон бояд ҳушёриву зиракиро аз даст надода, бо масъулияти баланди шаҳрвандӣ бар зидди ҳама гуна зуҳуроте, ки боиси паст задани эътибори миллати мо мегарданд, мубориза баранд.