ДМИТ: Татбиқи барномаи мубодилаи донишҷӯён

Душанбе, 11.02.2016. (АМИТ «Ховар»). — Дар доираи созишномаи ҳамкории байни Донишкадаи молия ва иқтисоди Тоҷикистон ва донишгоҳҳои хориҷи кишвар барномаи мубодилаи донишҷӯён амалӣ гардида, тибқи ин барнома 8 донишҷӯ аз факултаҳои мухталифи донишкада барои таҳсил дар давраи баҳории соли 2015-2016 ба Донишгоҳи нави иқтисодӣ ба номи Т.Рисқулови Ҷумҳурии Қазоқистон ва 1 нафар ба Донишгоҳи менеҷменти Алмаато сафар намуданд.
Инчунин барои иштирок намудан дар барномаи мубодилаи донишҷӯён зиёда аз 20 донишҷӯи донишкада ба Донишгоҳи Пскови Федератсияи Русия номнавис шуда, аз байни онҳо 7 донишҷӯи донандаи забонҳои русӣ ва англисӣ интихоб шуданд. 6 феврали соли равон 7 донишҷӯи интихобшуда барои таҳсил ба Донишгоҳи Пскови Федератсияи Русия сафарбар гардиданд.
Дар маҷмӯъ, шуъбаи робитаҳои байналмилалии ДМИТ барои таҳсил дар давраи баҳории соли хониши равон 16 донишҷӯро барои таҳсил ба хориҷа равон намуд, ки ин яке аз муваффақиятҳо дар ҷодаи татбиқи барномаи мубодилаи донишҷӯён мебошад.