Гирифторони бемории нашъамандӣ дар ҷумҳурӣ 7313 нафарро ташкил доданд

Душанбе, 26.02.2016 (АМИТ «Ховар»).- «Аз соли 1994 инҷониб аз тарафи мақомоти ҳифзи ҳуқуқ ва сохторҳои низомии Тоҷикистон беш аз 113 тонна маводи мухаддир, аз ҷумла 34 тонна героин мусодира шудааст, ки ин метавонист наздик ба 50 миллион нафарро гирифтори бемории нашъамандӣ намояд»,- гуфт директори Агентии назорати маводи нашъаовари назди Президенти Ҷумҳурии Тоҷикистон Шерхон Салимзода зимни ҷаласаи Шӯрои ҳамоҳангсозӣ оид ба пешгирии суиистифодаи маводи нашъаовар, ки имрӯз дар Агентии назорати маводи нашъаовар баргузор гардид.
Ба иттилои Шерхон Салимзода то 31-уми декабри соли 2015 дар қайди диспансери наркологӣ 7313 гирифтори бемории нашъамандӣ ба қайд гирифта шудааст, ки ин нисбат ба ҳамин давраи соли гузашта 0,5 фоиз ё ин ки 34 нафар зиёд мебошад.
Ба гуфтаи ӯ, аз теъдоди умумии гирифторони бемории нашъамандӣ 189 нафарро занон ташкил медиҳанд ва теъдоди зиёди нашъамандон дар шаҳри Душанбе ба қайд гирифта шудаанд.