«Ҳифозати забон-ҳифозати миллат аст»

Душанбе, 22.02.2015. (АМИТ «Ховар»).- Дар Шўрои олимони Донишкадаи соҳибкорӣ ва хизмати Вазорати саноат ва технологияҳои нав бо ташаббуси кафедраи фарҳанги соҳибкорӣ ва забони факултети хизмати молиявӣ мизи мудаввар таҳти унвони «Ҳифозати забон-ҳифозати миллат» доир гардид, ки он ба Рўзи байналмилалии забон бахшида шуда буд.
Дар мизи мудаввар ректори донишкада, доктори илмҳои иқтисодӣ, профессор Қодирзода Диловар, профессорону устодон ва донишҷўёни фаъол ширкат доштанд.
Муовини раиси Кумитаи забон ва истилоҳот Матробиён Саодатшоҳ зимни суханронӣ зикр карданд, ки: «Забон дар ҳама давру замон барои муаррифии миллат рукни муҳим ва муқаддас ба шумор рафта, поку беолоиш нигоҳ доштани он вазифаи ҳар як соҳибзабон ва шахси ватандӯст мебошад. Арҷ гузоштан ба забони давлатӣ ва риояи меъёрҳои он шароит фароҳам месозад, ки балоғат ва фасоҳати забон густариш ёбад, сохтори он такмил гардад ва қонунмандии рушди забони давлатӣ тақвият ёфта, инкишофи бонизоми он таъмин шавад».
«Боиси хушҳолии зиёд аст, ки имрӯз бо забони адабии тоҷикӣ сухан гуфтан дар сартосари Тоҷикистони азиз ба ҳукми анъана даромада, мардум, бахусус наврасон ва ҷавонон кӯшиш карда доранд, ки қонунмандии меъёрҳои забони адабиро ба инобат гирифта, сухангӯю сухандон бошанд»,- илова намуд сарходими илмии Пажуҳишгоҳи забон, адабиёт, шарқшиносӣ ва мероси хаттии АИ ҶТ, доктори илмҳои филологӣ Абдуғаффор Ҷўраев.
Дар мизи мудаввар инчунин дар мавзӯҳои «Вазъи имрўзаи забони адабии тоҷик ва шартҳои риоя намудани меъёрҳои он» ва «Истифодаи бамавриди калимаҳои шевагӣ-омили ташаккули забони адабии тоҷик» муҳокима шуданд.
Ноиби ректори донишкада оид ба корҳои таълим, доктори илмҳои иқтисодӣ Самариддин Низомов афзуд, ки забони тоҷикӣ имрӯз ба забони илму фарҳанг табдил ёфта, чорабиниҳои илмӣ бо забони давлатӣ сурат мегиранд, олимони мо асарҳо ва мақолаҳояшонро бо риояи меъёрҳои забони адабии тоҷикӣ таҳия карда, ҷиҳати инкишофи забон сайъу кӯшиши зиёд менамоянд.
Якдилӣ ва якмаромии намояндагони илмҳои мухталиф дар ин мизи мудаввар боиси рангинтар ва ҷаззобтар гардидани фаъолияти ин маъракаи илмӣ гардид.