Ҷиргатол: Тавзеҳи Паёми Пешвои миллат дар байни аҳолӣ

Душанбе. 18.02.2015. (АМИТ «Ховар»).-Дирӯз дар бинои Мақомоти иҷроияи маҳалии ҳокимияти давлатии ноҳияи Ҷиргатол вохӯрии ду гурӯҳи таблиғотию фаҳмондадиҳӣ оид ба Паёми имсолаи Асосгузори сулҳу Ваҳдати миллӣ, Пешвои миллат Эмомалӣ Раҳмон ва тағйиру иловаҳо ба Конститутсияи Ҷумҳурии Тоҷикистон, яке бо сардории директори Агентии хизмати давлатии Ҷумҳурии Тоҷикистон Ҷумахон Давлатов ва намояндагон- мудири кафедраи ҳуқуқшиносии ДМТ Изатулло Маҳмудов, дотсенти кафедраи ҳуқуқи байналмилалии факултети ҳуқуқшиносии ДМТ Файзалӣ Идиев ва дуюмӣ бо сардории мудири бахши Раёсати мудофиа ва тартиботи ҳуқуқии Дастгоҳи иҷроияи Президенти Ҷумҳурии Тоҷикистон Алишер Абдуллозода, сардори шуъбаи Маркази исломшиносӣ Зиёвиддин Шоев, вакили Маҷлиси намояндагони Маҷлиси Олии Ҷумҳурии Тоҷикистон Олимҷон Cафаров ва роҳбарони ҳифзи ҳуқуқи ноҳияю кормандони Мақомоти иҷроияи маҳалии ҳокимияти давлатии ноҳия бо фаъолону ҷавонони ноҳия баргузор гардид.
Дар ҷамъомади мазкур намояндагони гурӯҳҳои корӣ оид ба Паёми навбатии Пешвои миллат Эмомалӣ Раҳмон ва тағйиру иловаҳо ба Конститутсияи Ҷумҳурии Тоҷикистон сухан гуфтанд.
Ҷумахон Давлатов ва устодони ДМТ сабабҳои ворид намудани тағйиру иловаҳоро ба Конститутсияи Ҷумҳурии Тоҷикистон шарҳ дода, сокинони ноҳияро барои иштирок дар раъйпурсии умумихалқӣ даъват намуданд.
Дар вохӯрӣ Алишер Абдуллозода доир ба муҳтавои Паёми навбатии Пешвои миллат Эмомалӣ Раҳмон ва самтҳои асосии он оид ба ҳифзи амнияти миллӣ, ришваситонӣ, ҷалб гардидани ҷавонон ба сафи Қувваҳои мусаллаҳи Ҷумҳурии Тоҷикистон ва ба гурӯҳҳои ифротӣ шомил нагардидани ҷавонон суҳбат намуд.
Намояндагони гурӯҳҳои таблиғотию ташвиқотӣ дар якҷоягӣ бо роҳбарони мақомоти ҳифзи ҳуқуқ ва кормандони мақомоти иҷроияи маҳалии ҳокимияти давлатии ноҳия дар 10 ҷамоати шаҳраку деҳоти ноҳия чунин вохӯриҳоро бо мардум мегузаронанд.