Кӯлоб: Донишгоҳро 52 нафар бо дипломи аъло хатм кард

Душанбе, 05.02.2016. (АМИТ «Ховар»).-Дар Донишгоҳи давлатии Кӯлоб ба номи Абӯабдуллоҳи Рӯдакӣ бо иштироки ҳайати устодону кормандон ва намояндагони васоити ахбори омма нишасти матбуотӣ доир гардид. Ректори донишгоҳ, профессор Абдулло Ҳабибулло зикр намуд, ки дар донишгоҳ 446 омӯзгор фаъолият менамояд, ки аз онҳо 19 доктори илм, 19 профессор, 59 номзади илм ва як нафар академики АМ ФР ва Арбоби илму техникаи ҶТ мебошанд. Дар соли 2015 донишгоҳро 659 донишҷӯ аз тариқи буҷавӣ хатм намуда, 52 нафар соҳиби дипломи аъло гардидаанд. Аз 659 хатмкарда то ба имрӯз 469 нафар тибқи роҳхат ба ҷои кор ҳозир шудаанд.
Дар нишасти матбуотӣ ректор Абдулло Ҳабибулло ҳамчунин зикр намуд, ки раванди таълим дар донишгоҳ ба тарзи низоми кредитии таълим ҷараён дорад ва дар ин самт ба пешравиҳо ноил гардидем. Аз тарафи дигар барои расидан ба ормонҳои олӣ тасмим гирифтаем, ки принсипи қатъии риояи интизоми таҳсил ва назорати сифати азхудкунии дарсҳоро, ки мутаассифона, чун дар аксарияти таълимгоҳҳо дар донишгоҳи мо ҳам ислоҳталаб аст, ба роҳ монем.