Кӯлоб: Семинари машваратӣ доир ба пешгирии ифротгароӣ

Кӯлоб, 23.02.2016 (АМИТ «Ховар»).- Дар шаҳри Кӯлоб бо ибтикори Раёсати Кумитаи амнияти миллии Ҷумҳурии Тоҷикистон дар вилояти Хатлон ва мақомоти иҷроияи ҳокимияти давлатӣ доир ба шомилшавии ҷавонон ба ҳизбу ҳаракатҳои иртиҷоӣ дар партави Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон семинари илмӣ — амалӣ таҳти унвони «Пешгирӣ аз тероризму ифротгароӣ ҳушёрии ҷомеаро талаб мекунад» баргузор гардид.
Исмоил Пирмуҳаммадзода, сархатиби масҷиди ҷомеаи Ҳисор гуфт, ки яке аз сабабҳои иштироки ҷавонони мо дар ҳаракату гурӯҳҳои ифротии динӣ, аз ҷумла дар даргириҳои хунини Ховари Наздик, ноогоҳии онҳо аз моҳияти ҳақиқии дин аст. Терроризму ифротгароӣ имрӯз мардуми тамоми сайёраро ба ҷунбиш овардаанд ва ҳар як давлат муваззаф аст, ки барои пешгирӣ аз пайомадҳои ин зуҳуроти нангини аср тадбирҳои мушаххасу муассир андешад.
Дар анҷоми семинар иштирокдорон амалҳои муғризонаи гурӯҳҳои террористиро маҳкум намуда, иброз доштанд, ки ҳеҷ гоҳ намегузоранд гурӯҳҳои ғаразноку манфиатҷӯ сулҳу субот ва фазои озоду ободи кишварро халалдор созанд.