Конфронси илмӣ-амалии ҷумҳуриявӣ доир ба Паём дар ДДЗТ

Душанбе, 19.02.2016. (АМИТ «Ховар»). -Имрӯз, 19-ум феврал дар Донишкадаи давлатии забонҳои Тоҷикистон ба номи Сотим Улуғзода конфронси илмӣ-амалии ҷумҳуриявӣ дар мавзўи «Паёми Президенти Ҷумҳурии Тоҷикистон — барномаи рушди босуботи ҷомеа» баргузор гардид.
Дар конфронс Ҷамшед Мирзохонзода, сардори Раёсати тафтиши парвандаҳои ҷиноии махсусан муҳими Прокуратураи генералии Ҷумҳурии Тоҷикистон дар мавзўи «Паёми Президенти Ҷумҳурии Тоҷикистон — дастур барои мубориза бо терроризм ва экстремизм» сухан гуфт.
Ҳамчунин доктори илми фалсафа, профессор Муҳиба Маҳмадҷонова — мудири шуъбаи таърихи фалсафа, сиёсатшиносӣ ва ҳуқуқи ба номи Баҳоваддинови Академияи илмҳои Ҷумҳурии Тоҷикистон дар мавзўи «Шарҳу тафсири Паёми Президенти Ҷумҳурии Тоҷикистон, Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон» ва дигар устодону донишҷӯёни ДДЗТ маърўза карданд.
Бояд гуфт, ки дар ДДЗТ ба номи Сотим Улуғзода дар мувофиқа бо Паёми Пешвои миллат як силсила чорабиниҳо ба нақша гирифта шудааст. Донишкада иқдом гирифтааст, ки оид ба Паёми Президенти Ҷумҳурии Тоҷикистон Эмомалӣ Раҳмон бо устодану донишҷўён чорабиниҳо баргузор намояд.