Мақомоти Покистон 182 мадрасаро барои таблиғоти ифротӣ бастанд

Душанбе, 16.02.2016. (АМИТ «Ховар»). — «Мақомоти Покистон дар музофотҳои Панҷоб, Сидх ва Хайбар Пахтунхва мадрасаҳои ифротгароиро бастанд. Аксарияти аҳолии ин музофотҳоро паштунҳо ташкил дода, он ҷо «Толибон» нуфузи калон доранд». Дар ин бора агентии иттилоотии «REGNUM» хабар медиҳад.
Бино ба иттилои манбаъ, ҳукумати Покистон ҳамчунин 1026 ҳолати зуҳуроти ифротгароиро ба қайд гирифта, 230 гумонбарро дар фаъолияти террористӣ боздошт кардааст. 64 ташкилот мамнуъ шудаанд. Ҳамчунин фаъолияти бархе аз ташкилот мунтазам тафтиш шуда, аъзои онҳо зери назорати доимӣ қарор гирифтаанд.
Мақомот 1500 китоб ва дигар маводи чопиро ба хотири барангехтани адовати мазҳабӣ мусодира карда, ҳамчунин бар дари 73 мағоза мӯҳр задаанд.
Дар Покистони мусалмонӣ, ки дорои 200 миллион аҳолӣ мебошад, беш аз 2 миллион масеҳиён пайваста ба таъқиби доимӣ дучор мешаванд. Ифротгароён калисоҳои масеҳиёнро хароб карда, онҳоро бо аъзои оилаашон мекушанд. Онҳоро аз хона берун намуда, ҳатто ибодат кардану хондани Инҷилро манъ мекунанд.
Дар Покистон ҷиноятҳое, ки аксаран бар зидди масеҳиён содир мешаванд — ин рабудан ва таҷовузи занону духтарон, куштору лату кӯб ва инчунин ҳамла ва торумори ҷамоатҳои масеҳиёну деҳот мебошанд.