Машварати миллӣ оид ба беҳтаркунии низоми назорати заҳрхимикатҳо

Душанбе, 15.02.2016 (АМИТ «Ховар»).- 18 феврал дар пойтахти ҷумҳурӣ машварати миллӣ оид ба беҳтаркунии низоми назорати заҳрхимикатҳо бо дастгирии Ташкилоти озуқа ва кишоварзӣ (ФAO) баргузор мегардад.
Семинари мазкур бо мақсади баррасии натиҷаҳои омӯзиши ҳолати бақайдгирӣ ва назорати сифати заҳрхимикатҳо дар ҷумҳурӣ ва муҳокимаи имконияти ҳалли масъала баргузор мегардад.
Интизор меравад, ки дар ҷамъомад беш аз 20 мутахассиси идораҳои дахлдори давлатӣ ва ҳамчунин ташкилоти байналхалқӣ, ки шарикони ФAO дар Тоҷикистон мебшанд, иштирок кунанд.
Ҳафиз Мӯминҷонов, мутахассиси ФAO дар соҳаи растанипарварӣ гуфт, ки дар чорчӯбаи лоиҳаҳо ва барномаҳои ҳамкорӣ, ташкилот ба мамлакатҳои минтақа дар ҳалли масъалаи идораи заҳрхимикатҳо кумаки амалӣ мерасонад. Яке аз самтҳои муҳими ҳамкорӣ- ин ҷорӣ намудани усулҳои самараноки ҳимояи растанӣ ба шумор меравад, ки он меъёри истифодаи маводи кимиёвиро кам намуда, барои солимгардии муҳити зист шароит фароҳам меорад.
Дар семинар масъалаҳои танзими гардиши заҳрхимикатҳо, аз ҷумла, тартиби бақайдгирии онҳо, такмили қонунгузории соҳавӣ, ҳамчунин омодасозӣ ва нашри Феҳрасти заҳрхимикатҳо, ки истифодаи онҳо дар мамлакат иҷозат дода шудааст, муҳокима мешаванд.
“Дар айни замон, барои мубориза бо касаливу зараррасони кишоварзӣ воситаҳои гуногуни кимиёвӣ истифода мешаванд, ки бархе аз онҳо барои саломатии инсон, ҳайвонот ва муҳити зист хатари мутлақ дорад. Бинобар ин, Ҳукумати Тоҷикистон ба ФAO барои кумаки техникӣ барои мукаммалсозии низоми бақайдгирӣ ва назорати сифати заҳрхимикатҳо, муроҷиат намуд”, -изҳор дошт Виорел Гутсу, намояндаи ФAO дар Тоҷикистон.

Чорабинии мазкур дар чорчӯбаи лоиҳаи ФAO “Дастгирии техникӣ барои ҷорӣ намудани усулҳои самараноки зироати афзалиятнок ва дарахтони мевадор аз касаливу зарраррасонҳо” дар ҳамкорӣ бо Вазорати кишоварзии Ҷумҳурии Тоҷикистон ва Кумитаи ҳифзи муҳити зисти назди Ҳукумати Тоҷикистон гузаронида мешавад.