Машварати миллӣ оид ба услубҳои муосири муолиҷаи нашъамандӣ

Душанбе, 20.02.2016. (АМИТ «Ховар»).-Дар Душанбе машварати миллии дурӯза оид ба услубҳои муосири муолиҷаи нашъамандӣ бо иштироки наркологҳо, рӯҳшиносон, кормандони иҷтимоӣ ва кормандони ташкилоти ҷамъиятӣ аз ҷониби коршиносони Олмон ва Беларус гузаронида шуд
Семинар дар чаҳорчӯбаи марҳилаи шашуми Барномаи пешгирии паҳншавии маводи нашъаовар дар Осиёи Марказӣ (КАДАП-6 = CADAP-6) доир шуд. Ин барнома аз тарафи Иттиҳоди Аврупо (ИА) маблағгузорӣ ва аз тарафи Консорсиуми ташкилоти давлатҳои аъзои ИА амалӣ мешавад.
Барномаи «КАДАП-6» ин давоми сиёсату ҳамкории дарозмуҳлати ИА бо шарикони Осиёи Марказӣ барои мусоидат ва минбаъд тақвият додани сиёсати онҳо дар паст кардани талабот ба маводи нашъа мебошад.
Дар машварат дар бораи асосҳои гузаронидани ташхис ва муолиҷаи беморони нашъаманд, табобати онҳо бо дору, аз ҷумла муолиҷа бо маводи бетарёк дар ҳолатҳои хос (ҳомиладорӣ, дарди музмин, иллати ғайриасосии рӯҳу асаб ва вируси норасоии масунияти одам (ВИЧ)), ташвиқ ба парҳезу худдорӣ ва истифода аз доруҳои нави рӯҳафзо маълумот дода шуд.
Коршиносони ИА пешниҳод карданд, ки мутахассисони маҳаллии соҳаи табобати нашъаманд барои иштирок дар омӯзишҳои таълимӣ дар давраи аз 2016 то 2017 даъват шаванд. Омӯзишҳо аз тарафи коршиносони Олмон, Беларус ва Австрия гузаронида мешаванд. Пас аз хатми омӯзишҳо мутахассисони маҳаллӣ сертификатҳои Донишгоҳи фанҳои амалии Франкфуртро мегиранд.
Дар назар аст, ки пас аз гузаронидани курсҳои таълимӣ иштирокдорон чунин дарсҳои омӯзиширо барои ҳамкорони худ бобати беҳтар кардани стандартҳои муолиҷаи беморони нашъамандӣ гузаронанд.