Мулоқоти шаҳрдори Қайроққум бо соҳибкорон

Қайроққум, 09.02.2016. (АМИТ “Ховар”).-Роҷеъ ба вазъи бӯҳрони иқтисодӣ ва дар ин замина дастгирии соҳибкорону роҳбарони коргоҳҳои саноатӣ барои пешбурди кор ва содироти маҳсулоти истеҳсолшаванда дирӯз шаҳрдори Қайроққум Матлубахон Амонзода бо соҳибкорони шаҳр мулоқоти рӯ ба рӯ доир кард.
Тавре ки ба АМИТ “Ховар” роҳбари маркази матбуотии раиси шаҳр Рустами Одизода иттилоъ дод, зимни мулоқоти ошкоро, ки он бо иштироки соҳибкорон ва сарварони корхонаҳои саноатии шаҳр доир гашт, раиси шаҳр таъкид дошт, ки соли дуюм аст дар шаҳр бо ҳадафи густариши устувори фаъолият коргоҳҳои истеҳсолӣ тибқи нақшаи мукаммали муайян роҳандозӣ мешаванд. Дар ин замина, новобаста аз бӯҳрони шадиди иқтисодӣ корхонаҳои саноатии шаҳр зимни фаъолият дар соли 2015 тавонистанд ба маблағи 1 млрд. 146 млн. 79,6 ҳазор сомонӣ маҳсулот истеҳсол намоянд, ки ин нисбат ба ҳамин давраи соли гузашта ба маблағи 192,1 млн. 430,8 ҳазор сомонӣ зиёд мебошад.