Қосимзода Идигул: Либоспӯшии занон озод аст

Душанбе, 4.02.2016 (АМИТ «Ховар»).- Раиси Кумитаи кор бо занон ва оила Қосимзода Идигул зимни нишасти матбуотӣ дар бобати фарҳанги либоспӯшии ҷавондухтарон сухан карда, таъкид дошт, ки бигузор духтарон ҳар гуна либосе, ки мехоҳанд, ба бар кунанд. Аммо либосеро ба худ мувофиқ донанд, ки шинам ва зебо бошад ва аз либоси ба бар намудаи худ дар назди мардум шарм накунанд.
Раиси кумита аз он изҳори нигаронӣ кард, ки имрӯз дар кӯчаҳо бархе аз духтарон бо либоси нимбараҳнаю қисми дигар пурра маҳкам мегарданд, ки хоси зани тоҷик нест.
Дар робита ба либоси сиёҳу аз сар то по пӯшида раиси кумита гуфт, ки таҳлилҳои мутахассисони соҳаи тиб нишон доданд, ки дар сурати пурра маҳкам кардани сару рӯй ба бадан ҳаво намерасад ва баъзеи онҳо ба касалиҳои пӯст гирифтор мешаванд.
«Либоспӯшии занон озод аст, мо танҳо даъват мекунем, ки либоси бонувони тоҷик бояд шинам ва ба онҳо зебанда бошад»,-илова намуд Қосимзода Идигул.