Пан Ги Мун: «Масъулияти бӯҳрони Сурияро ҷомеаи ҷаҳонӣ ба зимма дорад»

Душанбе, 05.02.2016 (АМИТ «Ховар»). — Дабири кулли СММ Пан Ги Мун масъулияти бӯҳрони Сурияро, ки 5 сол боз идома дорад, ба зиммаи ҷомеаи ҷаҳонӣ вогузошт.
«Ба наздикӣ аз оғози бӯҳрони Сурия соли шашум сар мешавад. Ҷомеаи ҷаҳонӣ ба пуррагӣ масъулияти ба танзим надаровардани онро ба зимма дорад», — гуфт Дабири кулли СММ.
Ба гуфтаи ӯ, музокироти Сурия дар робита ба тақвият ёфтани ҳамлаҳои ҳавоии ногаҳонӣ ба ин кишвар, ки нигаронкунандаанд, қатъ гардид.
Дар ин бора Пан Ги Мун зимни суханрониаш дар конфронси кишварҳои мададрасони Сурия дар Лондон иброз дошт.
«Боиси нигаронӣ аст, ки қадамҳои нахустини музокирот дар робита ба набудани дастрасии кумаки башардӯстона ва тақвият ёфтани ҳамлаҳои ҳавоӣ ва фаъолияти ҳарбӣ дар Сурия қатъ гардиданд», — гуфт ӯ.