Паём-идомабахши татбиқи нақшаю ҳадафҳои созанда

Душанбе, 29.02.2016 (АМИТ «Ховар»).- Паёми Президенти кишвар ба Маҷлиси Олии Ҷумҳурии Тоҷикистон чун ҳамешагӣ идомабахши татбиқи нақшаю ҳадафҳои созандаю бунёдгузор буда, барои ривоҷу равнақи ҳамаи самтҳои иқтисодию иҷтимоӣ нигаронида мешавад. Дар доираи корҳо барои ободию осоиштагии мардуми шарифи Тоҷикистон ва равона намудани неруву иқтидори сокинони меҳнатқарини диёри зебоманзар дар ноҳияи Ғончӣ бо сокинони деҳаҳои Қалъачаи Раис ва Қалъачаи Азими ҷамоати деҳоти Ғазантарак мулоқот баргузор гардид.
Иштирокдорони мулоқот ҷавононро ба меҳнати содиқона ҳидоят намуда, аз пеша намудани роҳи дурусти созанда ва шомил нашудан ба ҳизбу ҳаракатҳои ғайриқонунию ифротгароёна сухан карданд. Инчунин даъват шуд, ки дар роҳи ҳифзи Ватани маҳбуб ҷавонмарди асил бошанду хизмати ҳарбиро ҳамчун қарзи фарзандӣ дар назди падару модари худ донанд.
Ҳамчунин бобати Паём ва тағйиру иловаҳои ба Конститутсияи Ҷумҳурии Тоҷикистон пешниҳодшуда Сарвар Саидов, намояндаи «Созандагони Ватан» иброз дошт, ки ин тағйирот ба хотири Ваҳдати миллӣ, сулҳу оромӣ, суботи сиёсӣ, созандагиву ободонӣ, рушди устувори иқтисодӣ ва зиндагии шоистаи мардуми Тоҷикистони озоду соҳибистиқлол равона гардидаанд.