«Пешоҳанг» мактабиёнро ба ватанпарастӣ даъват мекунад

Душанбе, 26.02.2016. (АМИТ «Хован»).- Гурӯҳи ҷавонони «Пешоҳанг» дар якҷоягӣ бо кормандони Хадамоти пешгирии ҳуқуқвайронкунӣ дар байни ҷавонону ноболиғони Вазорати корҳои дохилӣ тӯли чанд рӯз бо хонандагони муассисаҳои таҳсилоти миёнаи умумии рақамҳои 24, 76, 51, 58, 74, 77, 78, 17-и ноҳияи Фирдавсии шаҳри Душанбе вохӯрӣ доир намуданд.
Дар ҷараёни вохӯриҳо дар мавриди Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва доир ба мавзӯъҳои «Баланд бардоштани ҳисси ватандӯстии ҷавонон» ва «Роҳҳои пешгирии гаравидани ҷавонон ба гурӯҳҳои ифротӣ» сухан рафта, иштирокдорон ба ободу зебо гардонидани Ватани маҳбуб даъват шуданд.
Мақсади вохӯрӣ хабардор гардонидани хонандагони муассисаҳои таҳсилоти миёнаи умумӣ бо фаъолияти гурӯҳҳои ифротию тундгаро, оқибати фаъолияти ташкилоти террористӣ дар давлатҳои алоҳида ва хатари онҳо ба ҷомеаи ҷаҳонӣ буд.
Сардори Хадамоти пешгирии ҳуқуқвайронкунӣ дар байни ҷавонону ноболиғони ШВКД дар ноҳияи Фирдавсӣ майори милитсия Муборакшо Бадалов оид ба риоя намудани Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» сухан карда, изҳор дошт, ки мактаббачагон ба корҳои беҳуда машғул нашуда, аз пайи омӯхтани илму дониш бошанд ва аз амалу кирдорҳои номатлуб парҳез намоянд.