Пешвои миллат ба афсарони Вазорати мудофиа хона тақдим кард

Душанбе, 22.02.2016. (АМИТ «Ховар»). — Имрӯз Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маҳаллаи 33 — юми ноҳияи Синои шаҳри Душанбе бинои 9 ошёнаи истиқоматиро барои оилаҳои афсарони Вазорати мудофиаи Ҷумҳурии Тоҷикистон ба истифода дод.

Фармоишгари асосии бунёди ин бинои боҳашамат, ки сохтмонаш соли 2014 оғоз гардида буд, Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон буда, аз ҷониби пудратчӣ — Ҷамъияти дорои масъулияти маҳдуди “Маҳмил-2012” сохта шудааст.

Баъди ифтитоҳи бинои нав Сарвари давлат Эмомалӣ Раҳмон дар ошёнаҳои аввал бо шароити зист шинос шуд.

Бинои истиқоматӣ аз 18 хонаи сеҳуҷрагӣ ва 27 дуҳуҷрагӣ иборат буда, бо тарҳи хеле зебо ва ҷавобгӯ ба талаботи меъёрҳои шаҳрсозӣ сохта шудааст. Маблағи умумии корҳои сохтмонӣ қариб 15 миллион сомониро ташкил дода, бино дар муҳлати муайяншуда бо сифати хуб мавриди баҳрабардорӣ қарор дода шуд.

Зимни шиносоӣ бо шароити зисти манзилҳои истиқоматӣ Сарвари давлат Эмомалӣ Раҳмон ба тарҳи лоиҳаи бунёди бино, сифати кори бинокорон ва ороишу таҷҳизонидани ҳуҷраҳо бо ашёи лозимаи рӯзгор баҳои арзанда дод.

Сарфармондеҳи Олии Қувваҳои мусаллаҳ, Президенти мамлакат муҳтарам Эмомалӣ Раҳмон ба афсарони хуштолеъ ва оилаҳои онҳо калиди хонаҳоро дар вазъияти тантанавӣ тақдим карда, манзилҳои навро тӯҳфаи арзандаи Пешвои миллат дар рӯзҳои таҷлили 23 — юмин солгарди таъсиси Артиши миллӣ маънидод кард.

Имрӯз 45 оилаи муҳофизони сарбаланду сарфарози Ватан, ки аъзои он дар маҷмуъ беш аз 240 нафарро ташкил мекунад, бо шарофати сиёсати инсондӯстонаи Президенти мамлакат муҳтарам Эмомалӣ Раҳмон соҳиби манзили зист шуданд.

Афсарон ва кормандони Вазорати мудофиа дар ҷавоб ба ин иқдоми хайрхоҳона бароҳбари давлат изҳори сипос карда, ваъда доданд, ки барои ҳифзи марзу буми Ватан ва арҷгузорӣ ба муқаддасоти он содиқона хизмат мекунанд.

Бо шарофати соҳибистиқлолии мамлакат ва сиёсати неку ояндасози Пешвои миллат муҳтарам Эмомалӣ Раҳмон таъминоти моддию техникӣ, сол то ба сол шароити хизмати афсарону сарбозон беҳтар гардида, Артиши кишвар баробари муҷаҳҳазгардонӣ бо техникаю муҳимоти ҷангии муосир ба як ниҳоди пурқувват мубаддал гардидааст.

Таъмини афсарону дигар ходимони низомӣ бо манзили зист яке аз тадбирҳои неки Президенти мамлакат Эмомалӣ Раҳмон дар самти беҳдошти сатҳи зиндагии афсарону сарбозони Артиши миллӣ аст, ки бо шарофати пойдории сулҳу субот дар ҷумҳурӣ ба даст омадааст.