Покистон: Дар натиҷаи таркиши мошини гази моеъдор 15 нафар ба ҳалокат расид

Душанбе, 11.02.2016. (АМИТ «Ховар»). — Бино ба иттилои ВАО-и Покистон, дар музофоти Панҷоби ин кишвар мошини гази моеъдор бо мошини дигаре бархӯрд, ки дар натиҷа таркиш рух дод. Бар асари ин таркиш на кам аз 15 нафар, аз ҷумла 10 толибилм қурбон шуда, 20 каси дигар маҷрӯҳ гардиданд.
Ба гуфтаи шоҳидон, ронандаи мошини гази моеъдор дар туман назоратро аз даст дода, ба мошини дигар бархӯрдааст.
Тибқи маълумоти ба даст омада, пас аз бархӯрд оташ сар зада, алангаи он ду мошин ва як рикша (аробаи одамкашон)-ро, ки толибилмонро ба мактаб мебурд, ба доми худ кашид. Ин садама ба талафоти зиёди ҷонӣ оварда расонд. Ҳоло сӯхтор хомӯш карда шудааст. Наҷотдиҳандагон ҷароҳатбардоштагон ва фавтидагонро ба беморхонаи маҳаллӣ бурдаанд.
Миёни қурбониён занон ва кӯдакон низ ҳастанд. Вазъи баъзе аз захмишудагон вазнин арзёбӣ мешавад.