Шумораи беморони нашъаманд дар Тоҷикистон ба 7 ҳазор нафар расид

Душанбе, 05.02.2016 (АМИТ «Ховар»).-Бино ба иттилои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон шумораи беморони мубталои нашъамандӣ дар ҷумҳурӣ 7 ҳазору 313 нафар буда, аз онҳо 189 нафарашро занон ташкил медиҳанд. Дар муқоиса ба соли 2014 нишондиҳандаи шумораи умумии нашъамандон дар соли 2015 0,46% афзуд. Дар ин бора директори Агентии назорати маводи нашъаовари назди Президенти Ҷумҳурии Тоҷикистон Шерхон Салимзода имрӯз дар нишасти матбуотӣ изҳор дошт.
Соли гузашта 6 ҷаласаи Комиссияи иҷозатномадиҳӣ оид ба гардиши прекурсорҳо баргузор гардида, 10 иҷозатнома ва 6 шаҳодатнома барои ворид намудани прекурсорҳо дода шуд, зикр гардид дар нишаст. Бо мақсади таъмини назорат аз болои муомилоти прекурсорҳо 117 санҷиш гузаронида шуд, ки дар натиҷа 7 санад барои бартарафсозии камбудиҳо равона гардид.