Соли 2016 рушди иқтисод 7 фоиз таъмин мешавад

Душанбе, 01.02.2016. (АМИТ «Ховар»).- Аз рӯи нишондиҳандаҳои макроиқтисодӣ рушди иқтисод соли 2016 бояд 7 фоиз таъмин карда шавад. Дар ин бора зимни нишасти матбуотӣ раиси Бонки миллии Тоҷикистон Ҷамшед Нурмаҳмадзода иттилоъ дод.
Бино ба гуфтаи раиси БМТ, ҳангоми ба кор даровардани корхонаҳои азим дар минтақаи озоди Данғара, ноҳияи Ёвон, Ҳисор ва Б.Ғафуров маҷмӯи маҳсулоти дохилӣ зиёд хоҳад шуд.
«Имсол агар боду ҳаво мусоид ояд, истеҳсоли зиёди маҳсулоти кишварзӣ низ дар назар аст. Нишондиҳандаҳои макроиқтисодӣ асосан аз рӯи ду нишондиҳанда- саноат ва кишварзӣ таъмин мешаванд. Вале бояд гуфт, ки ба ин нишондиҳанда нархи ҷаҳонии нафт ва маводи хӯрокӣ низ таъсир мерасонад»,-илова намуд Ҷ. Нурмаҳмадзода.
Вазифаи бонк дар ин самт пешниҳоди зиёди қарзҳои имтиёзнок барои соҳаҳои истеҳсолот ва кишоварзӣ ба мардум мебошад, ки он барои зиёд кардани маҳсулот мусоидат карда, ба ММД таъсири мусбати худро мерасонад ва болоравии рушди иқтисодиётро таъмин менамояд.
Хотирассон мекунем, ки Бонки ҷаҳонӣ дар оғози сол дурнамои рушди кишварҳоро пешниҳод намуда, дар он пешгӯӣ карда буд, ки иқтисоди Тоҷикистон дар соли 2016 қариб то 5 фоиз рушд хоҳад ёфт.