Тағйиру иловаҳо асоси дунявият ва рушди кишваранд

Душанбе, 27.02.2016 (АМИТ «Ховар»). -«Давлатдории муосир ва демократӣ бояд ҳамарўза дар рушду нумўъ ва такомул бошад ва аз ҷиҳати рушди босуботи ҷомеа тағйир пазирад»,- гуфт директори Китобхонаи миллии Тоҷикистон профессор Назарзода С. зимни ҷаласаи васеъ перомуни тағйиру иловаҳо ба Конститутсияи (Сарқонун)-и Ҷумҳурии Тоҷикистон, ки дар Китобхонаи миллии Тоҷикистон баргузор гардид. Дар кори ҷаласа роҳбарияти Китобхонаи миллӣ, сардорони шуъбаву бахшҳо ва кормандони шуъбаҳо иштирок намуданд.
Тағйиру иловаҳо ба қонуни асосиро, ки тибқи раъйпурсии умумимиллӣ баргузор мегардад, аз шартҳои ҷомеаи мутамаддин ва асоси давлатҳои дунявӣ шуморида, таъкид намуданд, ки Конститутсияи кишвари мо вобаста ба замони гузашта ва давраҳои ҳассоси таърихӣ қабул гардида, дар асоси рушди ҷомеа ба тағйирот ниёз дорад. Асоси давлатдории муосир низ ҳамин аст, ки қонунҳо догма набуда, вобаста ба ҷамъият ва низоми давлатдорӣ танзим ва таҳия мегарданд.
«Шўрои илмӣ-методӣ»-и Китобхонаи миллӣ низ дар навбати худ ҷонибдории худро аз тағйиру иловаҳо ба Конститутсияи кишвар изҳор намуда, онро саривақтӣ ва муҳим арзёбӣ намуд.
Пешниҳод шуд, ки дар шуъбаву бахшҳои Китобхонаи миллии Тоҷикистон тағйиру иловаҳо мавриди омӯзиш қарор дода шаванд. Ташкилоти ибтидоии ҳизбии ҲХДТ дар Китобхонаи миллӣ «Китобдор», Иттифоқи касабаи кормандони Китобхонаи миллӣ, Шўрои занон ва Иттифоқи ҷавонони Китобхонаи миллӣ низ дар якҷоягӣ аз тағйиру иловаҳо ҷонибдорӣ намуда, онро саривақтӣ ва муҳим арзёбӣ карданд.