Таҷлили Рӯзи ҷанговарони интернатсионалист

Душанбе, 16.02.2016 (АМИТ «Ховар»).- Ба истиқболи 27-умин солгарди хориҷ шудани неруҳои низомии Иттиҳоди Шӯравӣ аз хоки Афғонистон 15-уми феврал дар мамлакат Рӯзи ҷанговарони интернатсионалист таҷлил шуд.
Нахуст дар назди муҷассамаи Қаҳрамони Иттиҳоди Шӯравӣ дар ҷанги Афғонистон Александр Мироненко маҳфили гиромидошти хотираи ҷанговарони интернатсионалист доир шуд.
Иштирокдорон ва ҷанговарони интернатсионалист аз лаҳзаҳои қаҳрамонию ҷонбозиҳои мардуми шӯравӣ ёдовар шуда, иброз доштанд, ки дар ин ҷанг садҳо ҷавонони шӯравӣ, аз ҷумла ҳамватанони мо ҳалок ва ҳазорҳо нафари дигар ярадор гаштанд. Зимни чорабинӣ ҳадафи таҷлили ин сана мусоидат ба ташаккули ҳисси ватанпарварӣ, эҳтиром ба арзишҳои миллию умумибашарӣ, дӯст доштану ҳимоят намудани Ватан ва кору рафтори намунавӣ дар ниҳоди ҷавонон ва насли наврас арзёбӣ гардид.
Ҳамчунин дар идомаи таҷлили Рӯзи ҷанговарони интернатсионалист дирӯз дар Муассисаи давлатии Китобхонаи миллии Тоҷикистон таҳти унвони «Интернатсионализм — таҷассумгари дӯстию осоиштагӣ, омили асосии мубориза бар зидди терроризми байналмилалӣ, экстремизм ва тундгароии динӣ» мизи мудаввар доир шуд.