Тозагии атроф кори ҳамагон

Душанбе, 26.02.2016. (АМИТ «Ховар»). — Ободӣ, тозагӣ, шукуфоӣ ва доимо соф будани оби дарё ва дараи зебоманзари Варзоб на танҳо аз сокинони ноҳия, балки аз ҳар як нафар меҳмону раҳгузар низ вобаста аст. Тавре ки мушоҳида мешавад, бисёр раҳгузарон аз дохили нақлиёт ҳар гуна зарфҳои обнӯшӣ ва ва пӯсти меваҷотро дар қади роҳҳо мепартоянд, ки дар натиҷа манзараи нохуш падид меояд. Кормандони маркази санитарии эпидемологии ноҳия ҳамасола дар тамоми минтақаҳои истироҳатии ҳудуди ноҳияи Варзоб, ки беш аз 600 ададро ташкил медиҳад, корҳои фаҳмондадиҳӣ, санҷишҳои махсус доир намуда, нисбат ба вайронкунандагони муҳити атроф санадҳои махсус тартиб медиҳанд. Ҳатто соли гузашта фаъолияти чанд минтақаи истироҳатӣ боздошта шуд.
Тозагии муҳити атроф ва покизагии оби ҷӯю дарёҳо аз ҳар нафар масъулияти бештарро тақозо дорад.