У. Давлатзод: «МОИ «Суғд» ва «Данғара» бештар рушд ёфтаанд»

Душанбе, 04.02.2016.(АМИТ «Ховар»).- Дар соли сипаригардида ба буҷети кишвар аз ҳисоби тавлидоти молу маҳсулот дар минтақаҳои озоди иқтисодии /МОИ/ кишвар қариб 20 миллион сомонӣ пардохтҳои гумрукӣ ворид шуданд. Умед Давлатзод-муовини вазири рушди иқтисод ва савдои ҷумҳурӣ мегӯяд, ки аз чор МОИ дар се минтақааш тавлидоти молу маҳсулот ба роҳ монда шудааст. Дар МОИ-и кишвар 62 субъект ба қайд гирифта шуда, сармояи мустақиме, ки ба ин минтақаҳо аз санаи таъсиси онҳо равона гардидааст, дар ҳаҷми 260 миллион сомонӣ аз худ карда шудааст.
Инчунин муовини вазири рушди иқтисод ва савдои кишвар афзуд, ки дар солҳои 2014-2015 аз Буҷети ҷумҳуриявӣ бо мақсади таъсиси инфрасохтори аввалиндараҷаи МОИ 10, 8 миллион сомонӣ мустақиман ба маъмуриятҳои МОИ ҷудо гардидааст.
Мавриди зикр аст, ки алҳол дар Ҷумҳурии Тоҷикистон чор минтақаи озоди иқтисодӣ- «Суғд», «Панҷ», «Данғара» ва «Ишкошим» фаъолият менамоянд, ки аз онҳо МОИ «Суғд» ва «Данғара» бештар рушд ёфтаанд.