Ҳудуди 9 ҳазор нафар ба машваратҳои сайёри ҳуқуқӣ фаро гирифта шуданд

Душанбе, 13.02.2016.(АМИТ “Ховар”).- Бо мақсади баланд бардоштани маърифати ҳуқуқии шаҳрвандони кишвар аз ҷониби мақомоти Ваколатдор оид ба ҳуқуқи инсон дар Ҷумҳурии Тоҷикистон танҳо дар зарфи соли сипаришуда беш аз 250 машварати сайёри ҳуқуқӣ гузаронида шуд, ки дар онҳо ҳудуди 9 ҳазор шаҳрванд ширкат доштанд.
Зариф Ализода -Ваколатдор оид ба ҳуқуқи инсон дар Ҷумҳурии Тоҷикистон мегӯяд, ки машваратҳои сайёри ҳуқуқӣ асосан дар қабулгоҳҳои ҷамъиятии Ваколатдор оид ба ҳуқуқи инсон, ки дар шаҳрҳои Кӯлоб, Қурғонтеппа, Хуҷанд, Хоруғ, Турсунзода, Роғун, Исфара ва ноҳияҳои Рашт, Қумсангир, Қубодиён ва Айнӣ фаъолият доранд, гузаронида шуданд. Омбудсмени тоҷик ҳамзамон зикр кард, дар ин давра ба қабулгоҳҳои ҷамъиятии Ваколатдор оид ба ҳуқуқи инсон шаҳрвандон асосан доир ба масъалаҳои ҳуқуқ ба моликият, замин, манзил, алимент, нафақа, таъминоти иҷтимоӣ, ҳуқуқ ба ҳаёти шахсӣ ва оилавӣ, инчунин муҳокимаи одилонаи судӣ муроҷиат намудаанд.