Ваколати Ватанзода пеш аз муҳлат қатъ гардид

Душанбе, 03.02.2016.(АМИТ «Ховар»).- Ваколати вакили палатаи поёнии Парлумони кишвар Ватанзода Маҳмадалӣ Маҳмадулло бо қарори Маҷлиси намояндагони Маҷлиси Олии ҷумҳурӣ 3 феврал пеш аз муҳлат қатъ гардида, ҳамзамон аз ҳайати Кумитаи Маҷлиси намояндагон оид ба қонунгузорӣ ва ҳуқуқи инсон бароварда шуд. Инчунин Ватанзода аз вазифаи раиси Кумитаи Маҷлиси намояндагон оид ба қонунгузорӣ ва ҳуқуқи инсон озод карда шуда, аз ҳайати Шӯрои Маҷлиси намояндагони Маҷлиси Олии Ҷумҳурии Тоҷикистон бароварда шуд. Бояд тазаккур дод, ки 27 январ бо Фармони Асосгузори сулҳу Ваҳдати миллӣ, Пешвои миллат, Президенти кишвар Эмомалӣ Раҳмон зимни тағйироти кадрӣ дар ҳайати Ҳукумати мамлакат Ватанзода Маҳмадалӣ Маҳмадулло ёрдамчии Президенти Ҷумҳурии Тоҷикистон оид ба масъалаҳои ҳуқуқӣ-намояндаи комилҳуқуқи Президенти Ҷумҳурии Тоҷикистон дар Маҷлиси Олии Ҷумҳурии Тоҷикистон таъйин гардид.
Дар ҷараёни ҷаласаи навбатии иҷлосияи дуюми палатаи поёнии Парлумони кишвар Шукурҷон Зуҳуров -раиси Маҷлиси намояндагон Ватанзода Маҳмадалӣ Маҳмадуллоро барои саҳми фаъолаш дар рушди парламентаризми тоҷик бо Ифтихорномаи Маҷлиси намояндагони Маҷлиси Олии Ҷумҳурии Тоҷикистон сарфароз гардонид.