Варзоб: семинари омӯзишӣ барои муаррифии рушди сайёҳӣ дар Тоҷикистон

Душанбе, 09.02.2016. (АМИТ «Ховар»).-Имрӯз бо ибтикори Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ва ҳокимияти маҳаллии ноҳияи Варзоб дар Маҷмааи лижаронии сайёҳии «Сафед-дара»-и ноҳияи Варзоб семинари омӯзишӣ барои беҳтар намудани сифати хизматрасонӣ ва ҷалби сайёҳон ба минтақа, муаррифии имконияту шароитҳои маҷмааи мазкур барои мизоҷону сайёҳон бо иштироки коршиносони соҳа, субеъктҳои хоҷагидори он, намояндагони муасисаи давлатии «Маркази татбиқи лоиҳаҳои шарикии давлат ва бахши хусусӣ»- и Кумитаи давлатии сармоягузорӣ ва идораи амволи давлатии Ҷумҳурии Тоҷикистон баргузор гардид.
Дар семинар муовини раиси ноҳияи Варзоб Баҳриддин Низомзода гуфт, ки ноҳияи Варзоб аз минтақаҳои сайёҳӣ арзёбӣ гардида, дар он барои сайёҳон тамоми шароит муҳайё гардидааст.
Назарзода Ризо, муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон мақсад аз баргузории семинарро рушди соҳаи сайёҳӣ дар минтақаҳои туристӣ арзёбӣ кард. Номбурда изҳор дошт, ки баргузории чунин чорабиниҳо барои дарёфти роҳҳои нави рушди сайёҳӣ ва ҳалли мушкилоти соҳа мусоидат менамояд. Ҳар як сайёҳ дар сурати хизматрасонии хуб метавонад даҳҳо сайёҳи дигарро ба ин мавзеъ ҷалб кунад.