Вохӯрӣ бо довталабон дар Ҳисор

Душанбе, 15.02.2016. (АМИТ «Ховар»). -Бо ибтикори Мақомоти иҷроияи маҳаллии ҳокимияти давлатии шаҳри Ҳисор дар Қасри фарҳанги ноҳия вохӯрии намояндагони Маркази миллии тестии назди Президенти Ҷумҳурии Тоҷикистон ва донишгоҳу донишкадаҳо бо довталабон баргузор гардид. Дар вохӯрӣ директори Маркази миллии тестии назди Президенти Ҷумҳурии Тоҷикистон Х.Тешаев, ректору муовинон, котибони масъули комиссияи қабули як зумра донишгоҳу донишкадаҳо ва зиёда аз 800 хонандаи муассисаҳои таҳсилоти миёнаи умумӣ, омӯзгорон ва падару модарон иштирок намуданд.
Ҳадафи асосии ташкили вохӯрӣ аз фаҳмонидани қоидаҳои қабули довталабон ба муассисаҳои таҳсилоти олӣ ва миёнаи касбӣ дар соли таҳсили 2016-2017 иборат буд. Директори Маркази миллии тестии назди Президенти Ҷумҳурии Тоҷикистон Х.Тешаев дар бораи тартиб ва низоми бақайдгириии довталабон, интихоби ихтисосҳо, имтиҳонҳои марказонидашудаи дохилшавӣ, тарзи баргузории озмун ва тақсимот ба муассисаҳои таҳсилоти касбӣ маълумоти муфассал дод. Баъдан ба ҳар кадом намояндаи донишгоҳу донишкадаҳо, аз ҷумла ба намояндаи ДДТТ ба номи Абӯалӣ ибни Сино барои муаррифии донишгоҳ, ихтисосҳо, факултетҳо ва дигар паҳлуҳои фаъолият ба муҳлати 5-7 дақиқагӣ сухан дода шуд.