Вохӯрии гурӯҳи «Пешоҳанг» бо хонандагони мактабҳои миёна

Душанбе, 16.02.2016 (АМИТ «Ховар»).- Ҷавонони фаъоли гурӯҳи «Пешоҳанг» бо мақсади баланд бардоштани ҳисси ватандӯстӣ, муқаддас доштани арзишҳои миллӣ ва тарғиби донишомӯзӣ мунтазам бо хонандагони мактабҳои миёнаи гуногуни ҷумҳурӣ вохӯриҳои судманд мегузаронанд.
Чунин вохӯрӣ дар Муассисаи таҳсилоти умумии №82-и ноҳияи Синои шаҳри Душанбе баргузор шуд.
Гурӯҳи хонандагони мактаби мазкур бо ҷавонони фаъол аз ҷойҳои тамошобоби пойтахти кишвар: Боғи устод Рӯдакӣ, Парчам ва Нишони давлатии Тоҷикистон дидан намуда, ҳамчунин бо шароити донишомӯзӣ дар Китобхонаи миллии ҷумҳурӣ шинос шуданд.
Дар идомаи чорабинӣ дар маҷлисгоҳи мактаби таҳсилотии №82 аъзои гурӯҳи «Пешоҳанг», мудири кафедраи педагогика ва психологияи Донишкадаи давлатии забонҳои Тоҷикистон Барно Ашурова ва раиси бахши ҷавонони Донишкадаи давлатии забонҳои Тоҷикистон Кишваршо Ниёзӣ дар назди хонандагон сухан гуфта, дар партави Паёми имсолаи Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии кишвар таҳти унвони «Паёми Роҳбар бишнав» роҷеъ ба мавзӯъҳои ватандӯстию хештаншиносӣ, арҷгузорӣ ба муқаддасоти миллӣ ва эҳтироми калонсолон суханҳои пурмӯҳтаво гуфтанд.