Зафаробод: Корҳои ободонӣ ба истиқболи 25-солагии Истиқлолият

Зафаробод, 06.02.2016 (АМИТ «Ховар»).- Дар доираи 500 рӯзи меҳнати зарбдор ба истиқболи 25 — солагии Истиқлолияти давлатии Ҷумҳурии Тоҷикистон дар ноҳияи Зафаробод корҳои ободонӣ вусъати тоза касб намудаанд.

Раиси ноҳияи Зафаробод Сулаймон Зиёзода зимни шиносоӣ бо корҳои бунёдкорӣ ба масъулин дастур дод, ки обёрии ниҳолҳо ва бо нурӣ  таъмин намудани замин бояд тибқи талаботи агротехнологӣ  ба роҳ монда шуда, нисбат ба парваришу нигоҳубини ниҳолҳои навшинонидашуда назорати қатъӣ бурда шавад.

Тибқи нақшаи мақомоти ноҳия дар мавсими имсола беш аз 500 адад ниҳоли сӯзанбарги сояафкан шинонида мешавад, ки ба гуфти масъулини мақомоти иҷроияи маҳаллӣ он барои боз ҳам ободу зебо гардидани ноҳия мусоидат хоҳад кард.