Амалиёти «Соҳили пок» дар Дарвоз

Душанбе, 25.03.2016. (АМИТ «Ховар»). -Кормандони бахши ҳифзи муҳити зисти ноҳияи Дарвоз бо гурўҳе аз хонандагону кормандони идораву муассисаҳо ва сарбозони қисмҳои низомӣ соҳили дарёи Панҷро аз партову ахлот пок карданд. Сардори бахши мазкур Саъдулло Сайфуллоев гуфт, ки дар ин амалиёт бештар аз якуним ҳазор нафар ширкат доштанд. Ин амалиёт баъди ҳар се моҳ баргузор мегардад. Дар поёноби ин дарё миллионҳо нафар зиндагӣ мекунанд ва дар фасли тобистон кўдакону наврасони зиёд ба оббозӣ машғул мешаванд. Аз ин рў мо сокиноне, ки дар саргаҳи об сукунат дорем, барои поку беолоиш нигаҳ доштани он масъул ҳастем.
Дар оғози фасли баҳор дар ин ноҳия наздики 7 ҳазор дарахтони ороишию мевадор шинонда шуданд. Солҳои пеш мо кўчати гулҳоро аз шаҳру навоҳии ҷумҳурӣ интиқол медодем, аммо ҳоло дар мавзеъҳои Паткуноб ва Роғак гармхонаҳо вуҷуд доранд ва соли равон дар маркази ноҳия ниҳолҳои ин гармхонаҳо шинонда шуданд.