Анҷумани минтақавӣ дар Суғд бо иштироки соҳибкорони хориҷӣ

Хуҷанд, 01.03.2016 (АМИТ «Ховар»). — 26-27- уми феврали соли равон дар шаҳри Қайроққум Анҷумани минтақавӣ оид ба шартномабандӣ байни истеҳсолкунандагони маҳсулоти кишоварзӣ, корхонаҳои коркард ва содироткунандагони ватанӣ бо доираҳои тиҷоратӣ ва соҳибкорони давлатҳои хориҷи дуру наздик доир гардид. Мақомоти иҷроияи ҳокимияти давлатии вилояти Суғд барои иҷрои дастуру супоришҳои Асосгузори сулҳу Ваҳдати миллӣ, Пешвои миллат, Президенти ҶТ муҳтарам Эмомалӣ Раҳмон дар самти афзун намудани содироти меваю сабзавоти Тоҷикистон ба кишварҳои хориҷӣ, хусусан Русияву Қазоқистон иқдомоти заруриро амалӣ менамоянд.
Дар Анҷумани минтақавӣ оид ба шартномабандӣ муовини раиси вилоят Анвар Яъқубӣ изҳор дошт, ки анҷумани мазкур бо мақсади дастгирии истеҳсолкунандагони маҳсулоти кишоварзӣ, корхонаҳои коркард ва содироткунандагон, дастгирии рушди савдои берунӣ, тақвият бахшидан ба равобити хориҷӣ ва байниминтақавӣ гузаронида мешавад. Вай ҳамзамон иттилоъ дод, ки дар анҷуман 120 нафар соҳибкорону истеҳсолкунандагон аз минтақаҳои гуногуни Тоҷикистон ва 27 намояндаи доираҳои тиҷоратии Русияву Қазоқистон иштирок карданд. Дар анҷуман асосан соҳибкорону тоҷику рус роҳҳои густариши ҳамкориро муҳокима намуданд ва дар натиҷа миёни онҳо 32 ёддошти ҳамкорӣ ба имзо расид.
Мақсади чорабинии мазкур мустаҳкам намудани алоқаҳои тиҷоратӣ байни соҳибкорони Ҷумҳурии Тоҷикистон ва Федератсияи Русия мебошад. Дар анҷуман бисёр ширкатҳои Федератсияи Русия, аз қабили «Магнит», «Агротехнологии», «Импексагро», «Деловой партнер» ва дигарон иштирок намуданд.
Дар чорабинии мазкур маҳсулоти истеҳсолшаванда муаррифӣ шуда, талаботи харидорон, роҳҳои минбаъдаи ҳамкорӣ ва равобит байни молистеҳсолкунандагони ватанӣ ва харидорон аз Русия омўхта шуданд.