Ассотсиатсияи кумак ва дастгирии Ҷопон дар Тоҷикистон 16 лоиҳаро амалӣ намудааст

Душанбе, 02.03.2016 (АМИТ «Ховар»).- Ба иттилои Такаша Камада, сарпарасти Сафорати Ҷопон дар Ҷумҳурии Тоҷикистон лоиҳаи «Рушди таҳсилоти фарогир барои кӯдакони дорои имконияти маҳдуд дар шаҳри Душанбе» аз ҷониби ҳукумати Ҷопон маблағгузорӣ шуда, то имрӯз барои омӯзиши кӯдакони маъюб чандин корҳо ба анҷом расонида, шароити хуб барои онҳо фароҳам оварда шудааст.
Ҳамчунин Такаша Камада илова намуд, ки ҳафтаи гузашта марҳилаи 3-юми лоиҳаи мазкур шуруъ шуд ва тибқи он барои кӯдакон компютер ва асбобҳои чопкунӣ пешкаш гардида, майдончаи варзишӣ сохта мешавад ва ҳамзамон омӯзгорон аз хориҷи кишвар барои таълими омӯзгорони маҳаллӣ даъват мешаванд.
Мавриди зикр аст, ки Ассотсиатсияи кумак ва дастгирии Ҷопон аз соли 2001 то инҷониб бо кумакҳои ҳукумати Ҷопон дар Ҷумҳурии Тоҷикистон 16 лоиҳаро ба маблағи 3,3 миллион доллар амалӣ намудааст.