Дарёфти ҷоми Академияи илмҳо

Душанбе, 9.03.2016. (АМИТ «Ховар»). -10 марти соли равон соати 09:00 дар Академияи илмҳои кишвар Олимпиадаи ҷумҳуриявии донишҷӯёни муассисаҳои таҳсилоти олии касбии ҷумҳурӣ барои дарёфти “Ҷоми Академияи илмҳои Ҷумҳурии Тоҷикистон” баргузор мегардад.
Тибқи иттилои котиби матбуотии Академияи илмҳо Шервони Умриддин, дар олимпиада 25 муассисаи таҳсилоти олии касбии ҷумҳурӣ иштирок хоҳанд намуд.
Олимпиада аз рӯи 12 самти илмӣ, аз ҷумла математика, физика, кимиё, астрономия, геология, биология, иқтисодиёт, технологияҳои иттилоотӣ, забон ва адабиёти тоҷик, таърих, фалсафа ва ҳуқуқ баргузор гардида, дар он беш аз 300 донишҷӯи муассисаҳои таҳсилоти олии касбии ҷумҳурӣ қувваозмоӣ хоҳанд кард.
Ҳадафи баргузории олимпиада баланд бардоштани шавқу завқи донишҷӯёни муассисаҳои таҳсилоти олии касбии ҷумҳурӣ ба омӯзиши илмҳои муосир, ташаккули тафаккури илмию техникӣ, бедор намудани завқи онҳо доир ба ҳалли масъалаҳои мураккаби илмӣ, озодона баён намудани фикр, инкишофи қобилияти эҷодӣ, истифодаи комёбиҳои соҳаҳои гуногуни илму техникаи муосир ва муайян намудани донишҷӯёни лаёқатманд ва гузаронидани тадқиқотҳои илмӣ мебошад.
Олимпиадаи ҷумҳуриявии донишҷӯёни муассисаҳои таҳсилоти олии касбии ҷумҳурӣ барои дарёфти “Ҷоми Академияи илмҳои Ҷумҳурии Тоҷикистон” соли сеюм доир мешавад.
Қисмати ҷамъбастии олимпиада барои дарёфти “Ҷоми Академияи илмҳои Ҷумҳурии Тоҷикистон” 11 – уми марти соли 2016, соати 15:00 баргузор мешавад.