ДМИТ: Мулоқот дар самти пешгирии амалҳои номатлуб

Душанбе, 31.03.2016. (АМИТ «Ховар»). 30 март дар Донишкадаи молия ва иқтисоди Тоҷикистон бо намояндагони сохторҳои гуногуни давлатӣ мулоқот дар самти пешгирии амалҳои номатлуби иҷтимоӣ доир гардид.
Тавре ки аз донишкадаи мазкур хабар доданд, дар мулоқот муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Ҳабибулло Амирбекзода сухан гуфта, аз ҷавонон даъват ба амал овард, ки аз дастовардҳои бузурги истиқлолият неру гирифта, барои пешрафти кишвар талош варзанд ва муаррифгари Тоҷикистон дар арсаи ҷаҳон бошанд, зеро сулҳу салоҳ ва тинҷию амонии кишвар беҳтарин неъмат ва имконият барои кулли сокинони кишвар, аз ҷумла ҷавононанд.
Муовини сардори хадамоти пешгирии ҳуқуқвайронкунӣ байни ноболиғон ва ҷавонони Вазорати корҳои дохилии Ҷумҳурии Тоҷикистон Давлат Назаров изҳор дошт, ки солҳои охир масъалаи ба ҷинояткорию қонуншиканӣ даст задани ҷавонон ташвишовар буда, мутаассифона, нишондиҳандаҳои оморӣ сол то сол афзоиш ёфта истодаанд. Ба гуфтаи номбурда, дар соли 2015 5840 ҷиноят аз тарафи ҷавонон содир шудааст, ки ин нисбат ба соли 2014 қариб 10% зиёд аст.
Ҳамзамон дар мулоқот аз ҷиноятҳое, ки аз тарафи духтарон ва донишҷӯён содир мешаванд, изҳори нигаронӣ карда шуд.