Х.Холиқназар: Ҳамкории Тоҷикистону Корея шароит фароҳам меорад, то имконоти бои иқтисодии Корея истифода шавад

Душанбе, 31.03.2016. (АМИТ «Ховар»). — «Ҳамкорӣ байни  Ҷумҳурии Тоҷикистон ва Ҷумҳурии Корея   шароит фароҳам меоварад, ки имконоти  бойи иқтисодии ин кишвар барои рушди иқтисодиёти Тоҷикистон  истифода шавад»,- гуфт директори Маркази тадқиқоти стратегии назди Президенти Ҷумҳурии Тоҷикистон Худобердӣ Холиқназаров зимни машварати байналмилалии Корея- Осиёи Марказӣ, ки имрӯз дар Душанбе ба кори худ оғоз кард.
Машварати  байналмилалӣ таҳти унвони «Усулҳои вусъатбахшии ҳамкорӣ миёни Ҷумҳурии Корея ва Осиёи Марказӣ дар шароити тағйирёбии низоми иқтисодии Авруосиё» баргузор гардида, дар он директори бахши корҳои аврупоии ВКХ Ҷумҳурии Корея Чеол-Мин Пак, намояндаи Департаменти Аврупо, Амрико ва Авруосиё Ҷае-Йонг Ли, намояндагон аз Ҷумҳуриҳои Қазоқистон, Узбекистон, Қирғизистон ва Озарбойҷон иштирок доранд.
«Машварати  байналмилалии Корея Осиёи Марказӣ семинари муҳим буда, дар он масъалаҳои вусъат бахшидани ҳамкории иқтисодӣ миёни Ҷумҳурии Корея ва давлатҳои Осиёи Марказӣ баррасӣ хоҳанд шуд. Ҷумҳурии Корея  барои Тоҷикистон аҳамияти муҳим дорад.
Тавре ки  маълум аст, соли гузашта ҳангоми сафари Пешвои миллати тоҷикон Эмомалӣ  Раҳмон  ба Корея сафорати Тоҷикистон дар Корея ифтитоҳ шуда, инчунин созишномаҳои муҳим дар мавриди таҳкими ҳамкории иқтисодӣ, фарҳангӣ ва илмӣ ба имзо расид. Имрӯз мо он созишномаҳоро амалӣ хоҳем кард.  Машварати имрӯза барои таҳкими ҳамкории байни Тоҷикистону Корея такони ҷиддӣ хоҳад дод»,- илова намуд Х.Холиқназар.
Дар назар аст, ки дар машварат масъалаҳои рушди ҳамгироии иқтисодии Авруосиё ва Осиёи Марказӣ, ташаббусҳои Авруосиё ва дурнамои ҳамкорӣ миёни Корея ва Осиёи Марказӣ дар фазои тағйирёбандаи иқтисодиёти берунӣ мавриди баррасӣ қарор дода шаванд.
Дар машварат маърӯзаи меҳмонони хориҷӣ ва коршиносонӣ дохилӣ дар мавзӯъҳои « Стратегияи ҷавобии Қазоқистон ва оқибатҳои сиёсии он», «Рушди ҳамгироӣ дар Осиёи Марказӣ», «Иттифоқи иқтисодии Авруосиё ва Қирғизистон», «Рушди стратегии Форуми ҳамкории Корея ва ОМ» шунида хоҳанд шуд.