Хуҷанд: 50 ҳазор сомонӣ грант барои дастгирии рушди ҳунарҳои дастӣ ва меҳнати хонагӣ

Душанбе, 01.03.2016 (АМИТ «Ховар»).-Қарори раиси шаҳри Хуҷанд Раҷаббой Аҳмадзода «Дар бораи таъсиси грантҳо барои дастгирии рушди ҳунарҳои дастӣ ва меҳнати хонагӣ дар соли 2016 дар шаҳри Хуҷанд» ба тавсиб расид. Мутобиқи он дар соли 2016 — 15 гранти мақомоти иҷроияи ҳокимияти давлатӣ дар шаҳри Хуҷанд, аз ҷумла 5 грант ба маблағи 5000 сомонӣ, 5 грант ба маблағи 3000 сомонӣ ва 5 грант ба маблағи 2000 сомонӣ барои рушди ҳунарҳои дастӣ ва меҳнати хонагӣ муайян шудааст.
Грантҳо барои дастгирии ҳунармандон дар самти қолинбофӣ, кешбофӣ, атласу адрасбофӣ, читгарӣ, сӯзанидӯзӣ, қуроқдӯзӣ, дӯхти тоқиҳои миллӣ барои ҷавонон, мӯҳрабофӣ, сабадбофӣ, гаҳворасозӣ, сандуқсозӣ, заргарӣ, қаннодӣ, косибӣ ва гулпарварӣ пешбинӣ шуда, аз тариқи озмун ба беҳтарин лоиҳаҳои пешниҳодшуда дода мешаванд.
Маблағи умумии грант 50 ҳазор сомонӣ буда, он дар арафаи ҷашни 25- солагии Истиқлолияти давлатии Ҷумҳурии Тоҷикистон ба ғолибони озмун супорида мешаванд.