Курси такмили ихтисос барои мутахассисони шуъбаҳои ҳуқуқ

Душанбе, 29.03.2016.(АМИТ «Ховар»).- «Тартиби таҳия ва қабули санадҳои меъёрии ҳуқуқӣ дар мақомоти давлатӣ» таҳти чунин унвон дар Донишкадаи идоракунии давлатии назди Президенти Ҷумҳурии Тоҷикистон курси такмили ихтисос оғоз гардид. Курси мазкур барои сармутахассисон ва мутахассисони шуъбаҳои ҳуқуқи мақомоти иҷроияи марказии ҳокимияти давлатӣ роҳандозӣ гардида, то 2 апрел идома меёбад.
Тӯли як ҳафта ба шунавандагон доир ба мавзуҳои заминаҳои ҳуқуқии хизмати давлатӣ дар Ҷумҳурии Тоҷикистон, ҳадафҳои стратегии Ҷумҳурии Тоҷикистон, шарҳи тағйиру иловаҳо ба Конститутсияи (Сарқонуни) Ҷумҳурии Тоҷикистон, тартиби таҳия ва қабули санадҳои меъёрии ҳуқуқӣ дар мақомоти давлатӣ, зарурати баррасии муроҷиати шаҳрвандон, қоидаҳои таҳияи дастурамали мансабӣ дарсу мубоҳисаҳо гузаронида хоҳанд шуд.